Lorica/Fáeth Fiada

Patraicc dorone in n-immun-sa; i n-aimseir Loegaire meic Néil dorigned; fád a dénma immorror di-a diden co n.a manchaib ar náimdib in báis ro·bátar i n-etarnid ar na cleircheib. Ocus is luirech hirse in-so fri himdegail cuirp ocus anma ar demnaib ocus dúinib ocus dualchib: cech duine no·s·géba chech día co n-innithem léir i nDia, ní thairisfet demna fri-a gnúis, bid dítin dó ar cech neim ocus format, bid comna dó fri dian-bas. bid lu'rech di-a anmain iar n-a étsecht. Patraicc ro·chan so in tan do·rata na hetarnaidi ar a chinn ó Loegaire, na disged do silad chreitme co Temraig, conid annsin atchessa fiad lucht na n-etarnade comtis aige alta ocus iarróe i n-a ndíaid .i. Benen; ocus 'fáeth fiada' a hainm.

Atomriug índiu
niurt tríun togairm Tríndóite
cretim treodatad
foísitin oendatad
in dúilemon dáil.

Atomriug indiu
niurt gene Chríst co n-a baithius
niurt crochtho co n-a adnocul
niurt esséirgi cona fresgabáil
niurt tóniud do brethemnas bratha.

Atomriug indiu
niurt grád Hiruphin;
i n-urlataid aingel
hi frescisin eseirge ar cenn fochraice
i n-ernaigthib huasal-athrach,
i tairchetlaib fatha,
hi praiceptaib apstal,
i nhiresaib fuismedach,
i n-endgai nóem-ingen,
hi ngnímaib fer fírean.

Atomriug indiu
niurt nime,
soilse gréne,
etrochta snechtai,
áne thened,
déne lóchet,
luathe gáethe,
fudomna mara,
tairisem talmain,
cobsaidecht ailech.

Atomriug indiu
niurt Dé do'm luamaracht,
cumachta Dé do'm chumgabail,
ciall Dé do'mm imthús,
rosc nDé do'm reimcise,
cluas Dé do'm étsecht,
briathar Dé do'm erlabrai,
lám Dé do'm imdegail,
intech Dé do'm remthechtas,
sciath Dé do'm dítin,
sochraite Dé do'mm anucul
ar intledaib demna,
ar aslaigthib dualchae,
ar irnechtaib aicnid,
ar cach nduine mídú•s•thrastar dam
i céin ocus i n-ocus
i n-uathad ocus i sochaide.

Tocuirius etrum thra na huile nert-so,
fri cech nert n-amnas n-étrocar fristí do'm churp ocus do'mm anmain,
fri tairchetla saebḟáthe,
fri dub-rechtu gentliuchta,
fri sáib-ṙechtu heretecda,
fri himcellacht n-idlachta,
fri brichta ban ocus goband ocus druad,
fri cech fiss ar•a•chuiliu anman duini.

Crist do'm imdegail indíu
ar neim, ar loscud,
ar badud, ar guin,
co no•m•thair ilar fochraice;
Crist lim, Crist rium,
Crist i'm degaid, Crist innium,
Crist íssum, Crist úasum,
Crist dessum, Crist tuathum,
Crist il-lius, Crist i-sius, Crist i n-érus;
Crist i cridiu cech duine immi•m•rorda,
Crist i ngin cech óen ro•dom•labrathar
Críst in cech rusc no•m•dercædar
Críst in cech cluais ro•dam•chloathar.

Atomriug indiu
niurt trén togairm trinoit
cretim treodatad
fóisin óendatad
in dúilemain [dail].

Dominus est salus, domini est salus, Christi est salus;
salus tua, domine, sit semper nobiscum.

SOURCE
The Irish Liber Hymnorum. ed. and trans. J.H. Bernard and R. Atkinson. London: 1898. Available at: The Cornell Library Historical Monographs. URL: http://ebooks.library.cornell.edu:8099/Dienst/UI/1.0/Display/cul.cdl/cdl208?abstract=