Mor yỽ gỽael gỽelet
Jes. MS 111 (Llyfr Coch Hergest)
col. 1051

Mor yỽ gỽael gỽelet. kynnỽryf kynniret.
bratheu abryth uet. brithwyr ar gerdet,
ac ordaỽt galet, arardỽy dynghet. ac yrduỽ dyw-
et, ydywan goỻet, mab ny mat anet. mabineid
dynghet, anghenaỽd ageret. anghenvri gywet.
ỻoegyrwys aedywet. och rac anghyffret. hyt
ympenn yseithuet, or kalan kalet. gỽir ydaỽ
gỽaret. drỽyrdỽn damunet. gỽynvryn gỽarthaet,
gỽyned ydrydet. kymry vngyffret. euỻu aỻuchet,
coeluein eugỽaret, gỽiraỽt keudaỽt ket, gỽa-
ranrỽy reget. rann gan ogonet. =Gogonet
an rann. amrodes rỽyfuan, ambu bard datcan̄,
atgigleu gamlan. atwelir griduan. ac amvỽ-
yn kỽynuan, achynhen druan, achynnyd maban,
katwer yn vychan. kadoed awelan. kynnyd ka-
darnvan. cur ỻauur ỻuman, =Lumangoch
gỽnn vot. ỻeitheu oruot, arwyd eu dyuot, aer-
wyr eryrot. aweryr eu clot. eu cled cleu ragot.
Ragof rinwedeu. rann gann gynn angheu,
dyd gỽeinyd gỽaet creu. dyd keryd kaereu. ef a
daỽ ual diheu. a ches lyghesseu. ar treth narthre-
theu. ny ỻuyd naysỽueu. y eir bit greireu. o von hyt
vynneu. eret y duỽ byỽ budyeu. am byd ryd ra-
deu. drỽy eiryaỽl seinheu. asynhwyr ỻỽyr ỻỽfreu,
anroder rann diuieu. gỽenwled gỽal oleu. :.

[1053]