The Celtic Literature Collective

Ymddiddan Gwyddno Garanhir a Gwyn ap Nudd
Llyfr Du Caerfyrddin XXXIII

Tarv trin anvidin blaut.
Ar benic llu lid anhaut.
Dinam eiroes am oes naut.
Ygan gur gurt y kinnit.
Arbennic llv llid owit.
Athvit naut canyserchit.
Canis naut im arotit.
Mor verth y thogyuechit.
Guanur llv py dv pandoit.
ban deuaw o kad a chiminad
Maur ac aessaur in aghad.
Briuint penaur peleidrad.
Ath kiuarchaw hv yscun
Gur. ae iscuid in aghen.
Pebir gur pan iv dyechen.
Caringrun wimarch kad trablunt.
Hud im gelwire guin mab nud.
Gorterch creurdilad merch lut.
Canisti guin gur kiwir.
Racod ny ryimgelir.
Minnev guitnev garanhir.
Nim gade gan kyulauaret
Athi. urthi fruin ydwet.
Dywris im trum tawuy anet.
Nid y tawue nessaw alawaraw
Urthid. nam vin y tawue eithaw.
Erir mor terruin treiaw.
Yscithreid vy mordruy eur kywruy
Cann. y gan wyauarvy.
Gueleis aer rac kaer wantvy.
Rac mantvy llv a weleis
Aessaur brihuid. torrhid eis.
Mygedaul. kein a dygei treis.
Gwin ab nut but. bitinaur.
Kint ysirthei kadoet rac carnetaur
Dy ueirch. no bruyn briw y laur.
Ystec vy ki ac istrun.
Ac yssew. orev or cvn.
Dormach oet hunnv afv y maelgun.
Dormach triunrut ba ssillit
Arnaw canissam giffredit.
Dy gruidir ar wibir winit.
Mi awum iny lle llas guendolev.
Mab keidav colowin kertev.
Ban ryerhint brein ar crev.
Mi awum in lle llas bran.
Mab ywerit clod lydan.
Mab ywerit clod lydan.
Ban ryerint brein garthan.
Mi awum lle llas llachev.
Mab arthur uithir ig kertev.
Ban ryreint brein ar crev.
Mi awum lle las meuric.
Mab karreian clod edmic.
Ban ryreeint brein ar cic.
Ny buum lle llas gwallauc
Mab goholheth teithiac.
Attwod lloegir mab lleynnac.
Mi awum lle llas milvir
Prydein. or duyrein ir goglet.
Mi. wi. wiw. vintev. y. bet.
Mi awum lle llas milguir
Bridein or duyrein ir dehev.
Mi. wi. wiv. vintev. y aghev.