The Celtic Literature Collective

Lym awel llum brin
Llyfr Du Caerfyrddin XXX

Lym awel llum brin.
Anhaut caffael clid.
Llicrid rid reuhid llin.
Ryseiw gur arvn conin.
Ton trathon toid tu tir.
Goruchel guaetev rac bron banev
Bre bgreti allan or seuir.
Oer lle. luch ra brythuch
Gaeaw. crin caun calaw truch.
Kedic awel. coed inibluch.
Oer guely isscaud ygkisscaud
Iaen. cul hit caun barywhaud.
Birr diuedit guit gvyrhaud.
Ottid eiry guin y enes.
Nida kedwir oe neges.
Oer llinnev eu llyu heb tes.
Ottid eiry guin. aren.
segur yscuid ar iscuit hen.
Ryuaur guint reuhid dien.
Ottid eiry ar warthaw rev.
Gosgupid gint blaen guit tev.
Kadir yscuid ar yscuit glev.
Ottid eiry tohid istrad.
Diuryssintvy keduir y cad. 
Mi nidaw. anaw nim gad.
Ottid eiry o dv riv.
Karcharau goruit cul biv.
Nid annuyd hawdit hetiv.
Ottid eiry. gin goror
Mynit. llum guit llog ar mor.
Meccid llvwyr lauer kyghor.
Eurtirn am cirn. cirn am duir.
Oer llyri lluchedic auir bir
Diwedit blaen gvit gvir.
Gvenin igogaur guan gaur
Adar. dit duilith.
Kyssulwin kewin brin choch gwar.
Gwenin giodo. oer agdo
rid. reuid rev pan vo.
Ir nep goleith. lleith dyppo.
Guenin igkeithiv gwirdiv
Mor crin calaw caled riv.
Oer divlit. yr eluit hetiv.
Guenin ig clidur rac gulybur
Gaeaw. glas cunlleit cev ewur.
Dric weuet llyvrder ar gur.
Hir nos llum ros lluid riv.
Glas galn guilan in emriv.
Garv mir glau auit hetiv.
Sich guint gulip hint.
Kinuedauc diffrint.
Oer callet cul hit
Llywin awon hinon uit.
Driccin imynit avonit
Igniw. gulichid lliw llaur trewit.
Neud gueilgi gueled ir eluit.
Nid vid iscolheic. nid vid eleic
Unben. nyth eluir in dit reid.
Och gindilic. na buost gureic.
Kirchid carv crum tal cum
Clid. briuhid. ia. brooet llum.
Rydieigc glev o laur trum.
Bronureith breith bron.
Breith bron bronureith.
Briuhid talglan. gan
garn carv gulgrum cam.
Gorchuel awel guaet. vann.
Breit guir or seuri allan.
Kalangaeaw gurim gordugor
Blaen gruc. goreuynauc ton mor.
Bir dit deruihid ych kighor.
O kiscaud yscuid ac aral
Goruit. a guir deur diarchar.
Tec nos. y. ffissccau escar.
Kinteic guint creilum
Coed. crin caun caru iscun.
Pelis enuir pa tir hun.
Kin ottei eiry hid inaruul
Melin. nim gunaei artu awirtul.
Towissune lv y brin. tytul.
Can medrit morruit. y rodwit
A rid a riv eiry adiguit.
Pelis pan vid kyvarwit.
Nim guna pryder im prydein
Heno kyrchu bro priw uchei.
Y ar can kanlin owein.
Kin imtuin ariw eu ac yscuid
Arnad. diffreidad kad kynuid.
Pelis pa tir. ythuaguid.
Y gur a rithao duv. o rigaeth
Carchar. rut y par o penaeth
Owein. reged am ryvaeth.
Can ethiv ruiw in.
Rodwit iwerit a teulu na fouch.
Guydi. met meuil na vynuch.
Y bore gan las y dit
Ban kirchuid mug maur treuit.
Nyd oet uagaud meirch mechit.
Nim guna lleuenit llad.
Or chuetleu amcavall.
Kyuaruuan amcavall.
Kelein ariuar ar wall
Kiwranc run ar drud arall.
Canisfonogion mugc. alataut mechit.
Druduas nis amgiffre dit.
Periw new pereiste imi dyuit.
Gwir. igrid. rid rewittor.
Oeruelauc tonn. brith bron mor.
Ren rothid. duv. in. kighor.
Mechit mab llywarch. dihawarch
Vnben. glvystec llenn lliwalarch.
Kyntaw. a ffruinchluymus march.