Kyntaw geir adywedaw
Llyfr Du Caerfyrddin XXVII

Kyntaw geir adywedaw.
Y bore ban kyuodaw.
Croes crist in wissc ymdanaw.
Arhelv uy ren y guiscav
Hetiu. un trev a glyuaw.
Nid ew wy duu niscredaw.
Guiscaw ymdanaw inberch.
Ny credaw coel canyd kerch.
Y gur am creuyse am nerth.
Ymae vimrid ardebed.
Arowun ar more wyned.
Etyl butic bitaud ked.
Ymae vymrid ar kighor.
Arowun myned. ar mor.
Etyl butic bytaud ior.
Dyrcheuid bran y hadein.
Arowun myned ruvein.
Etil butic bytaud kein.
Ystarnde wineu fruin guin.
Redec hiraethauc raun rin.
ren new. oet reid duu genhin.
Ytarnde winev birr y blev.
Ruit ygniw. rygig. otew.
Mynyd vo truin. yduit trev.
Ystarnde winev hir y neid.
Ruit yg nyw rygig. woteid.
Ny lut ar lev trev direid.
Trum kyduod daear. tev deil dris.
Chuerv vuelin met melis.
Ren new ruitade vy neges.
O eissillit guledic. a gueith
Wtic. wosprid. aphedir pen pop ieith.
Sanffreid suynade in imdeith.
Heul eirioled arouned
Argluit. crist kely. colowin ked.
Dywyccviff wym pechaud am gueithred. [*]

Mi aego winneis y offereid
Bid. ae hesgip ae higneid
Ba beth orev rac eneid.
Pader a buyeid a bendiceid
Creto. ae canho rac eneid.
Hid waud goreu gortywneid.
Yscythrich fort a delhich ti. allunhich tagneuet.
Nythvi tranc ar trugaret.
Ro vyd. y. newynauc. a dillad y noeth.
A chenich golychuid.
O kyuil dieuil dothuid.
Syberu aseguir dolur ar eu knaud.
Guerth myned dros uessur.
Ystir nithiau ny bo pur.
Ryhun a ryetudaud. ariwiraud
O vet. a rietillter. o gynaud.
Llyna chuech chuerv erbin. braud.
Anudon am tir. abrad argluid.
A diuanv llaugar.
Dit braud bitaud ediwar.
O kyuodi pilgeint adeueint
Duhunau. ac y meitunav. ar seint.
Id keiff. pop cristaun. kyrreiueint.


[*] At the bottom of the page in a different hand:

Torrwin pisc tuth elerch
Ton. trybelid areith.
Duv y din a denvin kedimdeith.
Gorwin blaen perthen. Kein gywrev
Adar. hir dit bann cogev.
Trugar daffar duv orev.