Arduireaue tri trined in celi
Llyfr Du Caerfyrddin XI

Arduireaue tri trined in celi.
Yssi un athri. vned un yuni.
Vn guirth oe teithi. un duu diuoli.
Athuolaf uaurri maur dyurhidri.
Dyuolaur ysguir. Dyuolaudir ysmi.
Ys bud bartoni arhelv eloy.
Hanpich guell cristi.
Pater. & fili & spiru. domni on. adonay.

Arduireaue dev. yssi vn a deu.
Yssi tri hep. ev. hep haut y amhev.
Awnaeth fruith afreu afop. amriffreu.
Duu y env. in deu. duyuaul y kyffreu.
Duu y env. in tri duyuuaul. y inni.
Duu y env in vn. Duu paulac annhun.

Arduyreaue. vn issy deu ac un.
Issi tri ar nun. issi duu y hun.
Aunaeth maurth a llun. a mascul a bun.
Ac nat kyuorun bas ac anotun.
Auneth tuim ac oer. a. heul alloer.
Allythir. ig. cuir afflam im pabuir.
A. serch in sinhuir. a bun hygar huir.
Allosci. pimp kaer otyueti. wir.