Moli duu innechrev a diuet
Llyfr Du Caerfyrddin IX

Moli duu innechrev a diuet.
Ae kyniw ny welli ny omet.
Vn mab meir modridaw teernet.
Meir mam crist. ergynan rianet.
Dydav yr heul or duyrein ir goglet.
Dy eiraul ir dy. maur drugaret.
Ar dy mab iolud en karet.
Duv uchom. Duu ragom. Duu vet.
Ren new anrotone. ran trugaret.
Teyrn uron. tanc y romne. heb imomet
Diwyccomne a digonhom ogamuet.
Kin myned im guerid imiruet.
In tywill heb canvill im gorsset.
Ym gueinvod im gorod im gorwet.
Guydi merch ac imtuin glassuet.
A chyuet a chid im agraget.
Ny chisgaw gobuyllaw om diwet.
Gulad it imne. ysagro ymassvet.
Mal deil ovlaen guit daduet.
Guae aguar a graun maur uerthet.
Ac onysguataul y riet.
Kyn gatter ew in ryred. pressen. perygil uit inydivet.
Ny vir drud. nid yscrid iny timhyr.
Ny chiuid uore. ny chiueirch. nid eistet.
Ny chan wen nid eirch trugaret.
Bit chuero y talhaur iny diwet.
Syberuid. a maur wrid. a maret.
Meithrin corph. y lyffeint a nadret.
Allevuod ac imtuin enviret.
Ac aghen dydau urth gluydet.
Ew inluth dy chinull dy chiuet.
Dynessa heneint alled arnad.
Dy clust. di trein. di teint neud adwet.
Dy chricha croen diuisset.
Athuna heneint alluidet.
An eirolve ne inihagel. ar ren new rana trugaret.
Kintevin keinhaw amsser. Dyar adar glas callet.
Ereidir in rich. ich iguet.
Guirt mor brithottor tiret.
Ban ganhont cogev ar blaen guit.
Guiw handid muy. vyllauuridet.
Tost much amluc anhunet.
Kan ethint my kereint in attwet.
Ym brin in tyno. ininysset
Mor impop for itelher. rac crist guin nid oes inialet.
Oet in chuant in car in trosset
Treitau ty tir dyalltudet.
Seith seint a seith ugeint. a seith cant. awant in un orsset.
Ygid a crist guin. ny forthint vevygilet.
Rec aarchawe nim naccer. y rof aduv. dagnouet.
Am bo forth. y porth riet.
Crist ny buve trist ythorsset.