Nac im adneirun nev
Llyfr Du Caerfyrddin VII

Nac im adneirun nev. rim waredun.
Keugant kywraghaum. wide kywisscaran.
A chiwnod senet. A cheugant kinatlet.
A daduirein obet guydi hir gorwet.
Kywoethauc duw awet. y din iny deheu wuchet.
A dyadu tan ar poploet anylan.
Alluch a tharian. a llyaus llydan.
Ny llettaud lle dinag. na didrif na diag.
A widy tagde teernas arvere.
Dygettaur. y. tri. llv. rac drech. drem iessu.
Llu guirin guinion eiliv egilion.
Llv arall brithion. eiliv brodorion.
Tryde llv diuedit. syth leith gyweithit.
Hilant iglithuir un parthred dievil.
In vn nidaon gan dull aghimon.
Myny mae meillon agulith ar tirion.
Myny mae kertorion in kyveir kysson.
Kein vid ev goffalon gan guledic gorchortion.
Myny mae ehestil am teernas uwil.
Men y mae peryw hael iny claer kyueistet.
Rotiad bid beddrael. nid guael y gerenhit.
A chin deginull emne eilivert vedit.
or saul dymguytat. ar lleith dimgorbit.
Ac ew gueith dimgunelemne. dimbrodic dit.
Nis rydraeth ryuetev kyvoeth ruytev douit.