TITI LIVI AB URBE CONDITA LIBER XXXVII PERIOCHA
L. Cornelius Scipio cos. legato Scipione Africano fratre (qui se legatum
fratris futurum dixerat, si ei Graecia prouincia decerneretur, cum C.
Laelio, qui multum in senatu poterat, ea prouincia dari uideretur)
profectus ad bellum aduersus Antiochum regem gerendum, primus omnium
Romanorum ducum in Asiam traiecit.
Regillus aduersus regiam classem Antiochi feliciter pugnauit ad Myonnesum
Rhodiis iuuantibus.
Filius Africani captus ab Antiocho patri remissus est. Victo deinde
Antiocho ab L. Cornelio Scipione adiuuante Eumene, rege Pergami, Attali
filio, pax data est ea condicione ut omnibus prouinciis citra Taurum montem
cederet. L. Cornelius Scipio, qui cum Antiocho debellauerat, cognomine
fratri exaequatus Asiaticus appellatus.
Colonia deducta est Bononia.
Eumenis, quo iuuante Antiochus nictus erat, regnum ampliatum. Rhodiis
quoque, qui et ipsi iuuerant, quaedam ciuitates concessae.
Aemilius Regillus, qui praefectos Antiochi nauali proelio deuicerat,
naualem triumphum deduxit. M'. Acilius Glabrio de Antiocho, quem Graecia
expulerat, et de Aetolis triumphauit.