TITI LIVI AB URBE CONDITA LIBER XVII PERIOCHA
Cn. Cornelius consul a classe Punica circumuentus et per fraudem, ueluti in
conloquium euocatus, captus est.
C. Duillius consul aduersus classem Poenorum prospere pugnauit, primusque
omnium Romanorum ducum naualis uictoriae duxit triumphum.
Ob quam causam ei perpetuus quoque honos habitus est, ut reuertenti a cena
tibicine canente funale praeferretur.
L. Cornelius consul in Sardinia et Corsica contra Sardos et Corsos et
Hannonem, Poenorum ducem, feliciter pugnauit.
Atilius Calatinus cos. cum in locum a Poenis circumsessum temere exercitum
duxisset, M. Calpurni, tribuni militum, uirtute et opera euasit, qui cum
CCC militibus eruptione facta hostes in se conuerterat.
Hannibal, dux Poenorum, uicta classe cui praefuerat, a militibus suis in
crucem sublatus est.
Atilius Regulus cos. uictis nauali proelio Poenis in Africam traiecit.