Mab a'n Rhodded
Brother Madoc ap Gwallter (ca. 1250)
Llyfr Coch Hergest, col. 1151-1153

Y brawd Fadog ap Gwallter ai cant
Mab anrodet. mab mat anet. dan y
vreinheu mab gogonet. Mab yn
gỽaret ymab goreu. mab uam uorỽyn gre-
vyd adfwyn aeduet eireu. Heb gnaỽtaỽl tat.
hỽnn yỽr mab rat rodyat radeu. Doeth
ystyryỽn. A ryuedỽn ryuedodeu. dim ryued-
ach ny byd beỻach ny bỽyỻ eneu. Duỽ yn
gaỽr maỽr bychan. Kryf kadarn gỽann.
gwynnyon rudyeu. Kyuoethaỽc tlaỽt.
an tat an braỽt. audur brodyeu. Jessu yỽ
hỽnn yn benn rieu. Jssel uchel emanuel
mel y uedylyeu. Ych ac assen arglwyd p̔ssen.
p̔sseb pieu. A sopen weir. yn ỻe kadeir yn ỻiỽ
kadeu. Pali nyt utynn. nyt vryael gỽynn
y gynhynneu. Yn ỻe syndal ygkylch y wal.
gỽelit carpeu. Eissoes mae ef. dangos o
nef awnaeth gỽyrtheu. Oed uab naduỽ
reen. or hỽnn yken. ỻen a ỻyvreu. A dewinyon
asynnwyr doethon. dethol gampeu. A
darogan prophỽydi glan; glaer barableu.

[1151]

=========================================

y leueryd ỽrth uugelyd gỽylwyr ffagleu,
Egyl ytuyd aenos uel dyd. dyuu ynoleu.
yna ytraethỽyt. ac y koelwyt coeluein chỽed-
leu. Geni douyd. ygkaer dauyd yndiameu.
Son egylyon aglyỽ dynon a diolcheu.
ewenyd maỽr. aỻawer gaỽr. o ganueu,
Y duỽ gloria pax in terra. yn teruyneu,
Hedỽch yrbyt. iechyt y gyt. gỽedy agheu,
Gỽylynt wyr gynt. ogof hirynt. herwyd tadeu,
Gỽylwyr kywrein, gỽyr ydỽyrein.ardal brȳnev.
Paỽb ol ynol.gỽneynt trỽy reol.rann wyluaev,
Onos ynos. valchỽant aros. kyfuarosseu.
Gỽelsont seren.oliỽ amgen. ac amgylcheu,
Ac amgen rat not. norser uchot. vch y penneu,
Geni yna. y brenhin da. arwyd diheu,
Vu gysseuin. gan dri brenhin. vaỽr ybreineu,
Yna credant. yna kyrchant. kyrch godeheu.
Ac eu manac.seren oͤrat. yn roi goleu,
Kaerussalem.achaer uethlem. nyt yrmethleu.
Doethan yn rỽyd.ar ueirch ebrỽyd.wiỽ ebrānev.
Disgyn ynffysc. serē aedysc. wir ydysgeu,
Yrty ydadant.heb.dor heb gant gỽȳnaỽc dryssev.
Y mab ydoed.aanydoed.dan y nodeu,
Ae vam arlaỽr.ae bron̄ werthuaỽr.ỽrth yeneu.
Dyn a welant. duỽ y credant. da y credeu,
Ef adolant. nyohiryant. ar heir linyeu,
Sỽỻt agorant, eur anregant. aragoreu.
Myrr ac ystor. ardunyant cor. kerd rinwedeu.
Trỽy fford araỻ.troant yngaỻ. heb goỻedeu.
Rydun ae gỽlat. rac tỽyỻ a brat. ybrenhin geu,
Rỽystrỽyt erot.greulaỽn aruot.ar y arueu.
adwyt meibon. gỽiriō gỽȳnyon.gỽae y māmev.
Ac nyt gỽaent hỽy.gỽyn̄ ybyt hỽy.bot ȳ seinyev.
armerthyri.achaỽs euri. yneu rỽymeu.
Kyt bot ettwa.ewyỻys da. dial eisseu.
Nagỽneuthur da. nathraethu da. ar dauodeu.
Hynny aỽnaeth.ganedigaeth.dec wynneitheu.
Vn mab duỽ gỽir. ot edrychir.ar y dechrev.
Nos nadolic. nos antebic. y drych nosseu.
Nos lewenyd. y lu bedyd bydỽn nynneu,

[1152]

=========================================

Bendigedic. yỽr nadolic. deilỽg wledeu,
Pan anet y mab. arglwyd pob pab. pobpeth biev,
Darglỽydes.awna ynỻes. anỻud poeneu,
Ac angỽna ỻe: yntecca bre. yggobrỽyeu,