The Celtic Literature Collective

Bit Goch Crib Keilyaỽc.
Jes. MS 111 (Llyfr Coch Hergest)
col. 1030

Bit goch crib keilyaỽc. bit annyanaỽl y lef
owely budugaỽl; ỻewenyd dyn duỽ ae maỽl.
Bit laỽen meichyeit ỽrth ucheneit gỽynt. bit taỽel
yndeleit; bit gnaỽt aflỽyd ar diryeit,
Bit guhudyat keissyat. bit gnifiat gỽyd. a bit gyn-
nwys diỻat; agaro bard bit hard rodyat,
Bit avwy unbenn abit leỽ. a bit vleid aradỽy. ny
cheidỽ y wyneb ar ny rodwy,
Bit vnan redeint yn ardal mynyd. bit yngheuda-
ỽt oual; bit anniweir annwadal,
Bit amlỽc marchaỽc. bit ogelaỽc ỻeidyr. tỽyỻyt
gỽreic goludaỽc; kyueiỻt bleid bugeil diaỽc,
Bit amlỽc marchaỽc. bit redegaỽc gorỽyd bit uab
ỻen ynchỽannaỽc; bit anniweir deueiryaỽc,
Bit grỽm biỽ. a bit lỽyt bleid. esgut gorỽyd yar
heid: gỽesgyt gỽaỽn graỽn yny wreid.
Bit grỽm bydar. bit trỽm keu; esgut gorwyd yg-
kadeu; gỽesgyt gỽaỽn graỽn yny adneu.
Bit haha bydar. bit annwadal ehyt. bit ynuyt
ymladgar; detwyd or aegỽyl aekar.
bit dyfỽn ỻynn bit lynn gỽaewaỽr. bit granclef
gleỽ ỽrth aỽr; bit doeth detwyd duỽ ae maỽr.
Bit euein aỻtut. bit disgythrin drut. it chwanna-
ỽc ynvyt ychwerthin; bit wlyb rych. bit uynychmach
bit gỽyn claf. bit laỽen iach, bit chỽyrnyat colỽ-
yn: bit wenwyn gwrach,
Bit diaspat aeleu. bit ae bydin. bit besgittor dyre.
bit drut gleỽ: a bit reỽbre ~
Bit wenn gỽylyan, bit vann tonn, bit hyuagyl
gỽyar aronn; bit lỽyt reỽ. bit leỽ caỻonn,
Bit las ỻuarth. bit diwarth eirchyat. bit reinyat
yghyuarth; bit wreic drỽc ae mynych warth.
bit grauangaỽc iar. bit trydar gan leỽ. bit yn-
vyt ymladgar; bit tonn caỻon ganalar,
Bit wynn tỽr. bit orỽn seirch. bit hoffder ỻaỽer
aeheirch: bit lỽth chwannaỽc. bit ryngaỽc cleirch

[1030]