The Celtic Literature Collective

Kyvaenad Keluit
Llyfr Du Caerfyrddin V

Kynaenad keluit. kynelv o douit.
Kyuaenad kynan o crist kein didan.
Ac vei gyuerkinan am.y.gylchin huan.
Ar gnyuer pegor yssit y dan mor.
Ar gnyuer. edeinauc a oruc kyuoethauc.
Ac vei. vei. paup. tri trychant tauaud.
Ny ellynt vetraethaud. kywoethev y triudaud.
Din dyual y faud. Ny eruill cospaud.
Kymun bid paraud. in erbin tridaud.
Bid glaf glefychaud. ban wanha. y gnaud
Y diodrut. y isscaud.
Guae ti din hewid pir doduid unbid.
Onid imwaredit. or druc digonit.
Nev duid ythrihit. ythruid. a. kerit.
Drud dytihenit. dy imtuin ar logylwit.
Trvach dydivet. dy lauriav. o. vet.
Asegi athraed ymlith prit athydwet.
Dihafal dyimteith dyisscar ath kedimteith.
Corph diffid direid. gobuill. o. theneid.
Corph ni glivit paleueir y gilit.
Pa roteiste oth rev vet. kin kyues argel.
Pa roteiste otholud kin muill moll mud.
Ac y haruetud. ac y diadaud.
Ac ny riuelssud y meint a garyssud.
Ac itoet o wud y lurv teint. dud.
Adaon i taethant ig kymeint offuiant.
Prit prinude chant. othriit ageugant.
Ac ysmortiuant. mal gossod amrant.
A ueleiste o garant asv treis tragissant.
Ny phercheiste guener oth vaur etyllter.
Ni cheuntoste pader na philgeint na gosper.
Pader priw traethaud. gobuill o nebaud
Namuin y trindaud.
Ry talud istedlit tri seith pader beunit.
Affv ac nidoes. ac nithreghis. ev hoes.
Moe y dinwassute merwerit. no phregeth evegil.
An deid i glethuir guerth na buost vffil.
Ni phercheiste creirev na lloc na llanev.
Nid endeueiste kiwrev beirt gouec higlev.
Ni phercheiste kiureith creaudir new kin lleith
Llyaus aghiuieith adodute ardiareith.
Gvae vi pir imteith genhide in kyueith.
Gvae vi pirwuuf ar dikiuolv.
Pan douthume attad oeth bichan vianuad.
Neu rimartuad oth laur kueithad.
Arnun nincred ni nep. oth tremint. trvy ted.